”Зорныя ўнучкі” ў Магілёве

2017-12-14

Абласная бібліятэка г. Магілёва і Таварыства беларускай мовы імя Ф. Скарыны правялі вечарыну, прымеркаваную да юбілею народнага паэта Якуба Коласа.

З гэтай нагоды да нас у горад Магілёў завіталі Марыя Міхайлаўна Міцкевіч і Вера Данілаўна Міцкевіч. Госці прэзентавалі цікавую фотапрэзентацыю пра свайго легендарнага дзядулю — песняра. Распавялі пра «зорныя» і трагічныя часіны Якуба Коласа.

Падчас мерапрыемства некалькі вершаў прачыталі вучні настаўніцы беларускай мовы і літаратуры дзяржаўнай установы адукацыі «Сярэдняя школа № 25 г. Магілёва» Алесі Уладзіміраўны Новікавай. У выкананні вучаніц 6 «Г» класа Макарковай Анастасіі і Дземідзенкі Лізаветы прагучалі вершы Я. Коласа «Лес», «Месяц» і «Адлёт жураўлёў». Дзяўчаты атрымалі ад унучак Якуба Коласа памятныя прыемныя падарункі.

Пасля выступлення гасцей яшчэ доўга гучалі пытанні і ўдакладненні, бо тэма класікаў Коласа і Купалы, як аказалася, вельмі цікавіць і хвалюе магілёўцаў.

Напрыканцы вечарыны ўсе жадаючыя здолелі сфатаграфавацца і ўзяць аўтограф у Марыі Міхайлаўны і Веры Данілаўны.

Хочацца выказаць вялікую падзяку супрацоўнікам абласной бібліятэкі і старшыні гарадской арганізацыі «Таварыства беларускай мовы імя Францішка Скарыны» Дзьячкову Алегу Уладзіміравічу за клопат і руплівасць у падрыхтоўцы мерапрыемства.

Настаўніца беларускай мовы і літаратуры
дзяржаўнай установы адукацыі
«Сярэдняя школа № 25 г. Магілёва»
Новікава Алеся Уладзіміраўна