З клопатам пра родную мову

2017-05-02

У дзяржаўнай установе адукацыі «Сярэдняя школа № 33 г. Магілёва» 27 красавіка 2017 года прайшло адкрытае пасяджэнне метадычнага аб’яднання настаўнікаў гісторыі, беларускай мовы і літаратуры.

Пасяджэнне па тэме «Шляхі падтрымкі і пашырэння сферы выкарыстання беларускай мовы» прайшло ў форме семінара-прэзентацыі, падчас якога былі разгледжаны актуальныя пытанні папулярызацыі беларускай мовы і літаратуры.

Алена Аляксееўна Сомава расказала пра ролю асобы настаўніка ў выкладанні беларускай мовы і літаратуры, агульнадыдактычныя і вузкаспецыяльныя патрабаванні, найважнейшыя бакі дзейнасці настаўніка-літаратара, прывяла цікавыя прыклады з літаратуры. Пра ролю беларускай літаратуры ў сучасным грамадстве, літаратурныя праекты, модных і, як аказваецца, запатрабаваных сярод моладзі паэтаў, пісьменнікаў і іх ролі ў папулярызацыі беларускай мовы паведаміла Селіфонтава Людміла Валер’еўна. Галіна Якаўлеўна Князева падзялілася паспяховым уласным вопытам работы па пашырэнні сферы выкарыстання беларускай мовы сярод вучняў, іх бацькоў, педагагічных работнікаў. Наталля Мікалаеўна Храбрая прэзентавала работу настаўнікаў па папулярызацыі беларускай мовы, расказала пра асноўныя накірункі работы, шматлікія мерапрыемствы, прысвечаныя знамянальным і памятным датам, заняткі па папулярызацыі вытокаў народнай творчасці, традыцыйнага мастацтва, гісторыка-культурнай спадчыны, захаванню аўтэнтычнасці нацыянальных традыцый і абрадаў, якія праводзяцца настаўнікамі, каб спрыяць павышэнню прэстыжу беларускай мовы. Святлана Аляксандраўна Юрчанка падрыхтавала карысныя раздаткі для настаўнікаў: арыгінальныя фізкультхвілінкі на беларускай мове, парады для тых, хто хоча пачаць размаўляць на беларускай мове, этыкетныя выразы і інш.

Госці семінара, кіраўнікі метадычных аб’яднанняў, унеслі свае прапановы па падтрымцы і пашырэнні сферы выкарыстання беларускай мовы.

Усе прысутныя прыйшлі да адзінай высновы: папулярызацыя беларускай мовы — гэта перш за ўсё пастаянны працэс фарміравання моўнай і лінгвістычнай культуры дзяцей, выпрацоўка ў іх патрэбы пастаяннага спазнання і творчай дзейнасці. А таксама — гэта і пастаянны працэс работы над сабою педагогаў. Якія б мерапрыемствы мы ні праводзілі: навучальныя і факультатыўныя заняткі, конкурсы і вечарыны — важным застаецца стан беларускай мовы, бо гэта самы важны фактар фарміравання нацыянальнага менталітэту.

Кіраўнік метадычнага аб’яднання
настаўнікаў гісторыі, беларускай мовы і літаратуры
Л.В.Селіфонтава