Шэсць дзён для роднай мовы і літаратуры

2017-03-03

На мінулым тыдні ў сярэдняй школе № 11 беларуская мова гучала ўсе шэсць дзён. Настаўнікі Двужыльная А.В. і Заморына Г.І. ладзілі мерапрыемствы ў рамках Тыдня беларускай мовы і літаратуры.

Вучні адсвяткавалі Дзень роднай мовы, здзейснілі віртуальнае падарожжа ў Полацк — старажытны кульурны цэнтр нашай краіны.

Урокі і пазакласныя мерапрыемствы, літаратурныя вечарыны і гасцёўні прыцягнулі ўвагу школьнікаў усіх узростаў. Вучні пачатковых класаў часцей займалі месцы ўдзячных гледачоў, а іх старэйшыя калегі не толькі прадэманстравалі трывалыя веды беларускай мовы і літаратуры, але і зацікавілі «пачаткоўцаў» малавядомымі звесткамі з гісторыі жыцця і творчасці Францыска Скарыны, Ефрасінні Полацкай, Янкі Купалы, Якуба Коласа, Максіма Багдановіча.

Усе мерапрыемствы Тыдня суправаджаліся інтэрактыўнымі сродкамі, што вельмі спрыяла відовішчнасці. А работнікі школьнай бібліятэкі падрыхтавалі цікавую выставу твораў беларускіх паэтаў і пісьменнікаў мінуўшчыны і сучаснасці.

Салавей А.Ф., намеснік дырэктара
па вучэбнай рабоце